गुड मर्निङ ......गुड मर्निङ.......विहान मर्निङ वाकमा आम मानिसहरु यसै भन्दै हिडेको देखिन्छ । मर्निङ वाक कार्य सहज छैन किनभने मानिसका प्यारा चिजहरुको लिस्टमा निन्द्रा पनि पर्दछ । सायद धर्तिमा निद्रा प्यारो नलाग्ने कमै मात्र मान्छे होलान । निद्रा सवैलाई प्यारो हुन्छ । त्यसमा पनि विहानी पखको अझ मिठो र प्यारो हुन्छ । त्यो मिठो निद्रालाई त्यागेर उठन धेरै नै गाह्रो हुन्छ ।
अल्छीका लागि मर्निङ वाक अभिषाप नै हो कतिपय मानिसहरु कयौ दिन देखी मर्निङ वाक गर्छु भन्छन् तर विहान ओछ्यान छोड्न सक्दैनन । यद्यपी आवश्यकता, बाध्यता वा रहरले नै किन नहोस मानिसले निद्रादेवीको काख छाडेर सवेरै उठ्नु पर्ने हुन्छ । कनिकुथी बल्ल बल्ल उठेर मानिस मर्निङ वाकमा जाने गर्दछ । दीर्घ जीवन जिउनका लागि मर्निङ वाकले सहयोग गर्दछ । मर्निङ वाक सवैका लागि आवश्यक छ तर यहाँ कुनै न कुनै शारीरिक समस्या वा रोग नलागी त्यसमा पनि अहिलेका सुपरहिट रोगहरु सुगर र प्रेसर नभई मर्निङ वाक गर्ने गरेको देखिदैन ।
अव प्रसग जोडौ मर्निङ वाकमा हुने विभिन्न क्रियाकलाप वा घटनाको । यो लेखमा मर्निङ वाक प्रवृत्तिको सामान्य चरित्र चित्रण गर्न मात्र खोजिएको हो, कसैका प्रति लक्षित नहरेको जानकारी गराउदछु । मर्निङ वाक शारिरिक, मानसिक, भावनात्मक र मनोबैज्ञानिक सवै खाले स्वस्थ्यताका लागि गरिन्छ । एकाथरी मर्निङ वाकेहरु अर्काको मस्त कुरा काट्नमा व्यस्त देखिन्छन् । हात हल्लाइ हल्लाइकन अर्कोलाई नागेझार पार्ने गरी दाया बाया मतलव नगरीकन नकारात्मक कुरा काट्दै हिड्ने गरेको देखिन्छ । लाग्छ त्यो मर्निङ वाक हो की अर्काको कुरा काट्न भेला भएको जमात हो । अर्काथरी मर्निङ वाकेहरु कि हातमा एउटा रेडियो बोक्छन कि कानमा एरफोन ठोसेर हिड्छन् तव कुनै सवारी साधन पिछाडी आइ हर्न बजायो भने सुन्ने वाला छैनन । त्यस्तो भएमा दुर्घटनाको सिकार बन्ने खतरा रहन्छ ।
त्यस्तै मर्निङ वाकमा अनेक तौर तरिका र तान्डव देखिन्छन् । मर्निङ वाकमा कोही मजाले म्याराथुन मै भाग लिए जसरी दर्गुछन्, कोही जकिङ मात्र गर्छन, कोही त जीउ दुख्छ कि भने जसरी हिड्छन् भने कोही पाइला गनेको हो कि हिडेको छुट्याउन नसकिने गरी मर्निङ वाक गर्छन । पचास देखी साठी बर्ष जत्ति उमेर समुहका वा सो भन्दा माथीका श्रीमान् श्रीमती मर्निक बाक गर्दा संगै हिड्दैनन श्रीमान् कहा अगाडी पुगी सकको हुन्छ श्रीमती पिछाडी छोडिएको हुन्छ, अलि पर पुगेर श्रीमती हेर्दा नदेख्ने स्थिती भएको हुन्छ । विवाह गरेको आठ दश बर्ष देखी वीस, बाइस सम्मका वा मध्य उमेर समुहका जोडीहरु चाही लगभग नजिक नजिक हुदै हिडेको देखिन्छ भने भर्खर विहे गरेका वा माया जालमा बाधिइ भविश्यमा विहे हुने नहुने निश्चित नभएकाहरु हात समातेर वा अन्य स्पर्सका माध्यमबाट हिडेको देखिन्छ । ए बाबा जव घरबाट मिठो निद्रालाई तिलान्जली दिएर मर्निङ वाकमा निस्कनु नै छ भने मर्निङ वाकको मर्म र भावना अनुसारको गतिविधि गर्नु परो नि हैन र ।
मर्निङ वाकेहरुले मर्निङ वाक गर्दा ध्यान दिनु पर्ने महत्वपूर्ण कुरा हो लुगा । मर्निङ वाकमा हिड्दा लगाउने लुगाहरुको सामान्य सिद्धान्त हुन्छ जस्तैः ट्राउजर, हाफपाइन्ट, टि–सर्ट, जुक्ता आदी कतिले यस्तै मर्निङ वाकमा mिल्ने लुगा लगाएका हुन्छन् तर यहाँका आम मर्निङ वाकेहरुका लुगा नै गलत छन् कतिसम्म भने ओछ्यानमा सुत्न प्रयोग गरिएका मेक्सी लाउछन र त्यसलाई ढाक्न स्कार्फ ओडछन् । कतिपय गम्छा मात्र बेर्छन् । कतिपय महोदयाहरु त विहेमा जादा लाउने जस्तो मोति जडित सारी लगाएर हिडेको देख्न पाइन्छ । संसारमै नभएको यस्तो मर्निङ वाकको लुगा आश्चर्य लाग्दो छ ।
त्यस्तै कतिपय स्वघोषित प्रतिष्ठित हु भन्नेले पनि मर्निङ वाकमा लगाएको लुगा हेरे हुन्छ कि त ससुराल जाने जस्तो सर्ट र घुडा भन्दा तल सम्मको हिड्न नै असजिलो हुने क्वाटर लगाएको हुन्छ । त्यति मात्र होइन बाबा मर्निङ वाकमा जुत्ता अनिवार्य जस्तै हो तर फटफटे चप्पल धारण गरी सानका साथ मर्निङ वाक गर्छन । त्यस्तै मर्निङ वाकमा अर्को खाले पात्र पनि देख्न सकिन्छ त्यो के भने राज्यका ठूलो ओहोदामा बसेका वा समाजका प्रतिष्ठिाका पगरी गुतेकाहरुले पुरै हुल हुज्तत गरेर विहान स्कूल कलेज जानेलाई वा दैनिक काममा हिड्न बाटो प्रयोग गर्नेलाई अवरोध हुने गरी ताती लागेर बाटो डाकेर आफ्नै ससुरालीको दाइजो जस्तो गरी हिड्छन बरु त्यो हेरी त एउटा गरिवी सर्वसाधारण नै अनुसासित भै मर्निङ वाकमा संग्लन भएको देखिन्छ पाइन्छ ।
मर्निङ वाकमा हिडेका मानिसहरुका अनेक चरित्र र व्यवहार हरु देखिन्छन् । धेरैको उदेश्य त स्वस्थ्थ बन्नकै लागि हुन्छ तर कस्तो पनि देखिन्छ भने मर्निङ वाकलाई अर्काकी श्रीमतिलाई आँखा लाउने, अर्काको श्रीमान्लाई आँखा लाउने, युवा युवतीहरु मर्निङ वाकको बहानामा डेटिङ गर्ने जस्ता हर्कत पनि देखिन्छन् । मर्निङ वाकमा एक अर्कोलाई नाप्ने तौलने आदी धन्दा समेत गरेको देखिन्छ । जुन आवश्यक छैन । मर्निङ वाक एक विशिष्ट कुरा हो । नियमित मर्निङ वाकले मान्छेलाई सवै प्रकारको स्वस्थ्यता कायम गर्न सहयोग गर्दछ । रोग लाग्नु भन्दा रोग लाग्नै नदिनु बुद्धिमानी हो । तर अल्छीका हकमा मर्निङ वाक एक दुश्मनका रहन्छ । विश्व स्वास्थ्य संगठनले असल स्वास्थ्यलाई पूर्ण शारीरिक, मानसिक र सामाजिक स्वस्थ्यताको अवस्था हो भनी परिभाषित गरेको छ । यसरी राम्रो स्वास्थ्यको लागि मर्निङ वाक गर्नु आवश्यक पनि छ । मर्निङ वाकमा अनावश्यक बिषयमा ध्यान केन्द्रीयत नगर्नु बुद्धिमानी हुन्छ ।
वर्तमान समयमा विज्ञान प्रविधिको यान्त्रिक विकासले मानिसको शारीरिक श्रम र क्रियाकलापमा कमी आई रहेको छ जसले गर्दा मर्निङ वाकको सान्र्दभिकता अझ बढदै गएको छ तर मर्निङ वाक गर्नका लागि यहाँ कुनै विशेष स्थान छुट्याइएको छैन । वास्तवमा सरकारले मर्निङ वाकका लागि वातावरणिय हिसावले सुरक्षित स्थान छुट्याई स्थान बनाउनु पर्दछ । जसले गर्दा मानिसलाई बाटोमा हिड्न नपरोस । बाटोमा मर्निङ वाक गर्दा कतिपय मानिसहरुको ज्यानै गएको पनि छ । साधुरा सडकमा हिड्न पनि असजिलो हुने गरेको छ । मर्निङ वाक कर्ताले मर्निङ वाकको मर्म र भावना अनुसार मर्निङ वाकमा लगाउनु पर्ने लुगाफाटो देखि लिएर के गर्दा मर्निङ वाक राम्रो र फलदायी हुन्छ । त्यसका लागि विचार गरी तालिम वा शिक्षा प्रदान गर्नु पर्ने हुन्छ । त्यसैले नियमित मर्निङ वाकका लागि पूर्वाधार विकास, वातावरणिय र सामाजिक स्वच्छता अत्यावश्यक छन् । मर्निङ वाक शरीरका लागि हो देखाउन होइन भन्ने बुझ्न पनि जरुरी छ भने मर्निङ वाक जिन्दगी जिउने राम्रो आधार बन्नु पर्दछ फेसन हैन ।
Comments
Post a Comment